AR Elm və Təhsil Nazirliyinin akademik H.Əliyev adına Coğrafiya İnstitutunun Qurunun hidrologiyası və su ehtiyatları şöbəsinin müdiri, coğrafiya elmləri doktoru, professor Rza Mahmudov Azərbaycanda Su Ehtiyatlarının İnteqrasiyalı İdarəçıliyi üzrə Milli Siyasi Dialoqun İdarəetmə Komitəsinin 10-cu iclasında iştirak edib.
Ölkənin əlaqədar nazirlik və agentliklərinin, açıq səhmdar cəmiyyətlərinin və s. nümayəndələrinin iştirakı ilə baş tutan görüşün əsas məqsədi Avropa İttifaqı Ətraf Mühit Naminə (EU4Environment) Proqramının su və ekoloji məlumatlar çərçivəsində görülmüş işlər, planlaşdırılmış tədbirlər, su ehtiyatlarının inteqrasiyalı idarə edilməsi və s. ilə bağlı məsələlərin müzakirəsi olub.
Tədbirdə çıxış edən professor R.Mahmudov Azərbaycanda su çatışmazlığı, sudan istifadə ilə əlaqədar problemlərdən danışıb, məsələnin kəskin hal aldığını diqqətə çatdırıb. Qonşu ölkələrlə müqayisədə Azərbaycanın az su təminatlı ölkələr sırasında olduğunu vurğulayan alim ölkədə suya olan tələbatın artması, iqlim dəyişmələrinin su ehtiyatlarına təsiri və bununla əlaqədar gələcəkdə Azərbaycanın su ehtiyatında yarana biləcək daha böyük problemlər barədə proqnoz xarakterli fikirlər söyləyib.
Avropa İttifaqının məlumatlar bankının yaradılması və ondan istifadə, məlumatların etibarlılığının yoxlanılması və s. kimi qaldırdığı məsələlərin vacibliyini diqqətə çatdıran professor, bununla bağlı elmi müəssisələrin, elmi institutların problemlərinə aid fikirlərini önə çəkib. O bildirib ki, hidrometeoroloji məlumatların ödənişli olması elmi müəssisələrdə, o cümlədən Coğrafiya İnstitutunda çalışan alim və tədqiqatçıların, doktorantların hidrometeorologiya, iqlim, ətraf mühitin monitorinqi ilə bağlı məlumatların əldə edilməsində böyük maniyə yaradır. Halbuki Avropanın məlumatlar bazası hər bir tədqiqatçı mütəxəssis üçün açıqdır və elmin inkişafına xidmət edir.
Ümumdünya Meteorologiya Təşkilatının hidrometeorologiya sahəsində tədqiqatların genişlənməsinə, bu sahədə uyqun kadrların hazırlanmasına böyük önəm verdiyini xatırladan professor bütün uyğun tədbirlərdə - konqres və yığıncaqlarda sözü gedən məsələyə həmişə öz fikir və münasibətini bildirdiyini qeyd edib. O vurğulayıb ki, vaxtılə uzun müddət rəhbərlik etdiyi, hidrometeorologiya sahəsində 50 ildən artıq fəaliyyət göstərən, ölkə üçün zəruri kadrlar yetişdirən Ekologiya və Təbii Sərvətlər Nazirliyinin Hidrometeorologiya Elmi Tədqiqat İnstitutunun səbəbsiz olaraq, mütəxəssis və alimlərin rəyi alınmadan bağlanması təəccüb və narahatçılıq doğurur. Bunun düzgün olmadığını dilə gətirən mütəxəssis tədbir iştirakçılarının məsələyə münasibət bildirəcəklərinə və uyqun qərarın qəbul ediləcək qətnamədə öz əksini tapacağına ümid bəslədiyini diqqətə çatdırıb.
Alimin çıxışını maraqla izləyən tədbir iştirakçıları deyilən iradların qətnamədə mütləq yer almasıının vacibliyini qeyd ediblər.
